CEBU, Philippines — Andam ang Probinsya sa Sugbo nga motukod og “Double A slaughter house” o ihawan sa lungsod sa Barili.
Si Gobernador Gwendolyn Garcia atol sa iyang pagtambong sa Panumod Festival sa lungsod sa Barili mipahibawo nga motukod ang Kapitolyo og ihawan nga kumpleto og moderno nga ekipo sa barangay Mantalongon.
“Busa karong gabhiona, isaad sa Provincial Government, together with the Municipality of Barili, atong himoan og maayo nga desinyo, plano, and we are willing to spend as much as 50 to 100 million pesos alang sa pagpa-improve nato sa Mantalongon Market,” matod ni Garcia.
Ang maong ihawan nga tukoron ipaubos sab sa akreditasyon sa National Meat Inspection Service sa Department of Agriculture pagsiguro nga masunod sa standard ang pag-ihaw sa mga hayop nga han-ay, limpyo ug luwas sa pagbaligya ngadto sa lokal nga mga merkado.
Sa pagtambong ni Garcia sa maong festival mianunsyo usab ang gobernadora nga naggahin ang Kapitolyo og subsidiya alang sa walo ka contingents ug P4 million usab alang sa Munisipyo.
Ang matag contingent makadawat og tag P300,000 nga subsidiya pagbawi sa ilang nagasto alang sa maong kalihokan.
Sa nasayran ang Panumod Festival naghatag og pasidungog sa livestock market sa Mantalongon sa lungsod sa Barili nga giila sa tibuok rehiyon sa Visayas. (CEBU NEWS)