CEBU, Philippines — Gihatagan og usbaw nga P500 ang mga clean and green sa kabarangayan sa kagamhanan sa Siyudad sa Mandaue.
Si Konsehal Jennifer Delmar maoy nagduso sa resolusyon nga ilang gituki atol sa regular session nga ilang gipahigayon kagahapon.
Giaprobahan usab ang maong resolusyon nga kon kapirmahan na kini ni Mayor Jonas Cortes madawat sa mga kawani sa clean and green ang P4,500 nga honorarium sa matag bulan. Si Konsehal Delmar nipasabot nga ang kagamhanan sa Siyudad sa Mandaue adunay 900 ka clean and green nga mga kawani nga gidestino sa nagdaiyang dapit sa dakbayan.
Sa matag adlaw adunay upat ka oras nga trabaho ang mga kawani nga magsugod sayo sa kaadlawon hangtud sa alas 8:00 sa buntag bugti usab sa P4,000 nga honorarium sa matag bulan.
Dugang ni Delmar nga ang maong mga clean and green nga mga kawani maoy gitahasan sa pagpanglimpiyo sa palibot sa dakbayan matag sayo sa kaadlawon ug unang higayon sila nga nakadawat og usbaw sa ilang honorarium nga giphaom usab sa nagkamahal nga mga palaliton.* (BANAT NEWS)