CEBU, Philippines — Tungod di makadawat nga gibuwagan, usa ka biyudo ang mibunal og tubo ug nanunggab sa silingang magtiayon diha sa Purok Tisa, Barangay Tapol, Lungod sa Tabogon niadtong Lunes sa gabii, Hunyo 24, 2024.
Ang magtiayong biktima nag-edad og 42 anyos ug ang lalaki 47-anyos, pulos mga fish vendors samtang ang suspek 46 anyos sab nga pulos residente sa maong lugar.
Nasayran ang asawa nakaangkon og samad sa kamot nga agi sa dinunggaban sa screwdriver samtang ang bana gawas sa mga samad sa nagkadaiyang parte sa lawas nabalian matod pa kini og kamot tungod sa pagbunal og tubo.
Sa imbestigasyon sa Tabogon Police Station nga love triangle matud pa ang motibo sa krimen, human ilang nasayran nga dunay relasyon ang suspek ug ang babayeng biktima apan nasuko kini kay gibuwagan mao nga iyahang giatangan ang duha.
Gikan nagkalos og tubig ang mga biktima sa dihang giatake sa suspek. Nagrabehan ang lalaki kay human nalup-og gitiwasan kini pagbunalbunal sa suspek hangtud nakaangkon og grabeng kadaut sa kalawasan ug mga bukton ug dughan.
Sa dihang nitabang ang babaye, giduslak sab kini sa suspek og screw driver. Ang duha gidala sa tambalanan samtang boluntaryong nitahan sa kapolisan ang suspek kinsa pasakaan og kasong double frustrated murder. -- IBM BANAT NEWS