CEBU, Philippines — Miabot og 87 ka tonelada nga basura ang nakolekta sa gipahigayon nga Clean-up Challenge sa kagamhanan sa Dakbayan sa Sugbo, adlaw nga Sabado sa pangulo sa Cebu City Environment and Natural Resources Office nga si Reymarr Hijarra.
Ang maong kalihukan maoy ika-16 nga Cebu Citywide Clean-up Challenge sa siyudad nga gipahigayon sa mga kasapaan.
Mga plastic ang kasagaran nga nakuha nga mga basura diin niabot ngadto sa 70 ka mga sako ang nakolekta kadaghanan sa Barangay Ermita kung diin maoy bukana sa mga sagbot nga gikan sa Guadalupe River.
Mapasalamaton si acting Mayor Raymond Alvin Garcia sa mga niapil sa maong kalihukan ilabi na sa mga boluntaryo gikan sa mga national line agencies, NGO ug uban pa.
Ang mayor nipadayag nga kung wala ang pagtinabangay sa tanan alang sa maong clean-up drive mas makasinati pa unta ug grabe nga problema kung wala makuha ang maong daghan kaayo nga basura. Mapasalamaton si Garcia sa tanan mga tawo nga kanunay maglimpyo sa kasapaan sa dakbayan, sama sa Task Force Gubat sa Baha ug uban pa.
Gitunol usab ni Garcia ang iyang pasalamat sa mga Barangay Official nga padayon ug walay pagluya sa pagtabang sa pagpanalipod sa kalikupan. — /IBM (BANAT NEWS)