CEBU, Philippines — Patay ang usa ka 48 anyos nga motorista nga nasungag sa gikasugat nga SUV samtang nagdagan kini sa dalan national sa Barangay Yati sa Lungsod sa Liloan alas 10 pasadlo ang takna sa miaging Biyernes sa gabii.
Giila ni Police Major Eric Gingoyon, hepe sa Liloan Police Station ang biktima nga mao si Gernald Escultor Pagodon, nagpuyo sa Ignacia Village sa Barangay Pulpogan sa Lungsod sa Consolacion.
Samtang ang SUV nga nakasungag niini gimaneho usab ni Marjo Vincent Dumguit Dadula, 31, nagpuyo sa Dunggoan, Perelos, Siyudad sa Carcar.
Sa imbestigaasyon sa kapolisan ang biktima nagmaneho sa iyang motorsiklo padulong na pauli ngadto sa Consolacion samtang ang SUV paingon sa amihanang bahin sa lalawigan sa Sugbo.
Matud pa sa kapolisan, paghidangat sa maong lugar giingong kalit lang nga mi- counter flow ang biktima apan nasungag kini sa SUV nga nagdan sa pikas nga lane.
Gumikan sa kakusog sa pagbangga nalagpot ngadto sa taliwala sa karsada ang biktima nga maoy hinungdan sa grabeng naangkong kadaut sa kalawasan.
Dali unta kining gidala ngadto sa Danao Provincial Hospital apan si Dr. Francisco Dela Cuesta Jr. nga maoy nag-atiman ang mideklarar sa biktima nga dead on arrival. (BANAT NEWS)