CEBU, Philippines — Si Melquiades Feliciano, chief implementer sa Task Force Gubat sa Baha sa Dakbayan sa Sugbo malaomon nga mapalit na sa siyudad ang de-clogging machines nga gilantaw nga dako og tabang sa pagpanglimpiyo ilabi na niining nasinati nga pag-ulan-ulan.
Matud ni Feliciano nga ang maong ekipo dako kaayo og tabang ilabi na sa mga kanal nga nagtipun-og ang mga basura ug mga yuta nga lisod kaayo mano-manohon sa pagkuha.
Sayo pa, ang de-clogging machines tipik kini sa programa nga giduso sa task force ngadto kang Acting Cebu City Mayor Raymond Alvin Garcia atol sa ilang tigom uban sa mga sakop sa task force.
Gibutyag ni Feliciano nga anaa na sa kamot sa kagamhanan sa siyudad ang pagpakita sa ilang suporta aron maimplementar ang maong mga proyekto.
Ang de-clogging machines maoy tipik sa short-term plan sa pagsulbad sa baha ug aduna pay mga nagkadaiyang plano ang giduso sa task force ngadto kang Garcia.
Ang task force nagtinguha usab nga mopresentar sa ilang mga plano ngadto sa konseho atol sa session nga ipahigayon. (BANAT NEWS)