CEBU, Philippines — Wala madayon og check-in ang 28-anyos nga lalake ug uyab niini sa usa ka motel diha sa Barangay Carreta, siyudad sa Sugbo tungod kay napriso na hinuon tungod kay natintal sa pagkawat og e-bike nga gi-parking sa gawas sa maong motel.
Ang tagiya sa maong e-bike gikatahong niparking una kay miuli sa ilaha aron mopahuway, apan nakurat nalang nga nahanaw na ang iyang e-bike nga nagkantidad og P55 mil maong midiretso kini og dangup sa Mabolo Police Station 4 sa Cebu City Police Office.
Sa follow-up operation dunay nakatug-an sa kapolisan kun kinsa ang nikuha sa maong e-bike hangtud nga ilaha kining natultolan ug gidakop.
Ang suspek gikatahong nitug-an sa kapolisan nga padung ra gyud unta sila mo-check in sa iyang uyab kauban ilang barkada sab nga manag-uyab.
Apan natintal sila sa maong e-bike ug ilaha kining gisakyan-sakyan tibuok gabii aron magsuroy-suroy.
"Manglangoy-langoy (sa motel)...Wala mi kadayon og sulod kay nakit-an man namo ang e-bike," sigon sa suspetsado kinsa miingon nga nananghid siya mismo sa “e-bike” nga ilaha kining gamiton.
"Ana ko e-bike hulman tika kadiyot ibalik ra tika ugma..Nahibong mi pagkaugma naa namay police sa amoa," pangrason pa sa suspek.
Si Police Lieutenant Colonel Janette Rafter, Deputy City Director for Administration sa Cebu City Police Office miingon ilang pasakaan og kaso ang suspetsado. —IBM BANAT NEWS