CEBU, Philippines — Gipaumentohan sa siyudad sa Mandaue ang multa sa mga driver nga makalapas sa balaud sa trapiko diha sa dakbayan.
Kini sa tinguha nga mag-amping na ang mga drayber sa ilang pagmaneho sa ilang sakyanan.
Si Konsehal Jimmy Lumapas, chairman sa committee on transportation sa konseho sa siyudad sa Mandaue miingon nga ang katuyoan sa ilang pagpausbaw sa multa mao ang pagsilsil sa hunahuna sa mga drayber nga motuman gayod sa mga lagda sa trapiko pinaagi sa pagsunod sa mga traffic sign.
Samtang gitug-an ni Hyll Retuya, assistant department head sa Traffic Enforcement Agency of Mandaue (TEAM) nga kadaghanan sa mga violations sa mga drayber mao ang counterflowing, pag-overtake sa wala og dili pagtagad sa mga traffic sign sa kadalanan.
Sa karaan nga ordinansa nagpahamtang lamang kini og P1,000 nga multa apan karong bag-o giumentohan na kini ngadto sa P5,000 ang multa.
Niadtong miaging semana gihimo sa kagamhanan sa dakbayan ang pagpasaka sa multa nunot sa pagpahimangno nga mag-amping aron malikay nga makamulta. (BANAT NEWS)