CEBU, Philippines — Gihugopan sa pagsaksi sa mga molopyo sa kabarangayan sa siyudad sa Mandaue ang gipasiugdahan nga Panagtagbo Festival 2024 kagahapon Mayo 5, 2024 nga gipahigayon sa F.E. Zuellig Avenue sa Reclamation Area sa Siyudad sa Mandaue
Ang kalihukan maoy kabahin sa mga dagkong kalihokan nga gipasiugdahan sa kagamhanan sa siyudad alang sa tinuig nga pangilin ni Senyor San Jose nga maoy patron sa dakbayan nga magsaulog sa iyang piyesta sa matag petsa 8 sa bulan sa Mayo.
Mokabat sa 27 ka mga contingent gikan sa 27 ka barangay ang misalmot sa Panagtagbo Festival.
Ang kagamhanan sa dakbayan mipasiugda og libreng sakay sa mga molopyo nga misaksi gikan sa kabarangayan ngadto na sa venue hangtud na sa pagpamauli human sa kalihukan.
Nahimong hapsay ang dagan sa mga sakyanan sa maong lugar tungod usab sa gidistino nga 40 ka traffic enforcer nga maoy nagbantay.
Suma pa ni Traffic Operations Division Head Arnold Malig-on nga ilang gisirad-an ang pipila ka dalan sama sa north bound lane sa Ouano Avenue tungod kay didto man gipahigayon ang street dancing. — /MEL (BANAT NEWS)