CEBU, Philippines — Pormal na nga giablihan ang bag-ong gipalambo nga dalan sa Brgy. Caputatan Norte Brgy. Dalingding Sur Road Section sa lungsod sa Medellin.
Gipangulohan ni gobernador Gwendolyn Garcia uban nila Mayor Joven Mondigo ug mga membro sa municipal council ang pormal nga pagturn over sa maong dalan ngadto sa publiko.
Ang P59. million nga dalan adunay 3.2 kilometro nga gitas-on ug kalapad nga 6.1 metro. Ang gibag-on sa semento niini moabot usab sa 23 centimeters.
Si Garcia atol sa seremonyas nga gihimo niadtong Abril 27, nagkanayon nga importante gyud nga mapalambo ang mga dalan sa kalungsoran tungod kay makatabang kini sa pagpalambo sa ekonomiya sa lugar ilabina sa mga residente nga mag-agi sa karsada.
Kuyog sa gobernador sa maong kalihokan mao sila si Congresswoman Janice Salimbangon sa fourth district, ug mga bokal nga sila si Mela Franco ug Kerrie Shimura. Mitambong usab ang LMP President ug Daanbantayan Mayor Sun Shimura. — /MEL (BANAT NEWS)