CEBU, Philippines — Usa ka 42-anyos nga amahan nga gikatahong wala makatugpa kay sabog sa ilegal nga drugas sulod sa upat ka adlaw ang mi hostage sa iyang asawa ug duha ka anak kagahapon sa buntag sa Sitio Caduloy, Barangay Tisa, siyudad sa Sugbo.
Sulod sa ilang panimalay gi hostage sa amahan ang iyang 39 anyos nga asawa, 11 anyos nga anak nga lalake nga Person With Disability(PWD) ug ang babaye nilang anak nga 6 anyos gamit ang 10 pulgadas nga tubo.
Daling giadto sa kapulisan sa Labangon Police Station pinangulohan ni Police Major Eraño Regidor ang balay sa amahan nga nang hostage sa iyang pamilya.
Matud ni Regidor sa iyang negosasyon tali sa amahan nga nang hostage iyaha kining gipangutana kung unsay problema.
Sigon pa sa amahan dunay nagsunod-sunod niya, gani bisan naa na siya sulod sa ilang balay nila giingong naa gihapo'y magsige’g panuktok ug mangita niya.
Apan nahibaw-an ni Regidor gikan sa amahan sa nang hostage nga upat ka adlaw na diay kining wala katugpa kay migamit og illegal nga drugas ug nag nervous breakdown kini.
Nagkanayon sab si Regidor nga nangita og media ang suspek ug ang gusto niyang makaestorya mao ang reporter sa GMA Regional TV nga si Alan Domingo.
Tungod niini, nagpakaaron ingnon ang hepe nga siya si Alan Domingo ug didto nasuta nga ang gusto lang sa suspek nga dili siya patyon kay gusto na niyiang mo-surrender.
Gipasaligan sa kapulisan ang suspek nga luwas kini sa iyang paggawas kun boluntaryo siyang motahan. Tuod man gihimo kini sa suspek ug wala'y nasakitan sa mga gipang hostage niini.
"For now, atong gi assess ang iyang pagkatawo amo siyang gi custody for the meantime for the case of alarm and scandal initially kay kahibawo man ‘ta pamilya, kahibaw pud sa sitwasyon, ang among gihimo nakig coordinate sa Barangay Tisa sa ilang BHW aron ma inject og antidote nga makapakalma niya usa nato isulod sa selda kay makakita siya og tawo kurat-kuratan gyud siya," ni Regidor pa.
Nahibaw-an sab nga ikaduhang higayon na nga ang suspect nang-hostage, gihimo sab niya ang susamang krimen niadtong tuig 2018. (BANAT NEWS)