CEBU, Philippines — Patay ang 27-anyos nga motorista sa nahitabong aksidente duol sa gate 4 sa Mactan Export Processing Zone (MEPZ) sa M. L. Quezon national highway sa Barangay Ibo, Siyudad sa Lapu-Lapu alas-12 pasado ang takna sa miaging Lunes sa tungang gabii Abril 15, 2024.
Giila ang biktima sa kapolisan sa Lapu-Lapu City Police Office (LCPO) nga mao si Neil Saruelo Agudo, molupyo sa Barangay Tigbawan sa Lungsod sa Tabuelan sa amihanang bahin sa lalawigan sa Sugbo.
Si Police Master Sergeant Chrismar Lim, traffic investigator sa LCPO Traffic Enforcement Unit (TEU) miingon nga kusog ang dagan sa biktima luwan sa iyang motorsiklo apan kalit kining nawad-ag kontrol ug nabangga sa gutter sa nahisgutang dalan.
Dugang pa ni Lim nakaangkon og grabeng kadaut sa iyang kalawasan ang biktima, gidala unta kini sa Lapu-Lapu City District Hospital apan gideklarar kini sa mga doktor nga dead on arrival. (BANAT NEWS)