CEBU, Philippines — Nadakpan sa usa ka semanang operasyon sa Lapu-Lapu City Police Office (LCPO) ang 4,555 ka mga tawo gumikan sa kalapasan sa gipatuman nga mga lokal nga ordinansa sa kagamhanan sa siyudad sa Lapu-Lapu.
Suma pa ni Police Colonel Ali Baron Officer-In-Charge (OIC) sa LCPO nga padayon nga gihingusgan ang pagpatuman sa mga lokal nga ordinansa nga gitumong alang sa luwas ug malinawon nga dapit sa mga Oponganon.
lakip sa mga lokal nga ordinansa nga gihugtan sa pagpatuman mao ang paghapsay sa dagan sa trapiko hinungdan sa pagka impound sa pito ka mga sakyanan ug 31 ka mga motorsiklo.
Apil na usab ang pagdili sa katawhan sa pag inom ug ilimnong makahubog sa mga publikong lugar.
Higpit usab nga gidili ang pagpanabako sa publiko nga lugar ingon man ang paggawas sa panimalay nga maghukas kun hubo ang ibabaw nga bahin sa lawas.
Nagpadayon usab ang pahimatngon sa kapolisan sa mga ginikanan nga bantayan ang ilang minor nga mga anak nga dili makagawas ug magsuroy suroy panahon sa lawom na nga kagabhion. — /MEL (BANAT NEWS)