CEBU, Philippines — Makabaton og ilang kaugalingon nga kapuy-an ang 200 ka pamilya nga nagpuyo sa coastal area sa siyudad sa Lapu-Lapu nga maoy mga benepisaryo sa medium rise socialized housing project nga tukoron sa kagamhanan sa siyudad.
Kini human sa pagpinirmahay sa deed of donation sa duha ka ektaryang luna nga gidonar sa Johndorf Ventures Corporation pinaagi sa ilang president ug CEO nga si Frances Lim.
Lahi kini sa 25 ka ektaryang luna nga socialized housing project sa Barangay Canjulao nga hangtud karon wala pa masugdi og ugmad.
Si Lapu-Lapu City Mayor Chan maoy nangulo sa pinirmahay uban ni Kongresista Cindi Chan nga gitambongan usab ni Director Lyndon Juntilla sa Department of Human Settlement and Urban Development Central Visayas.
Suma pa sa mayor nga ang duha ka ektarya nga gidonar sa Johndorf venture Corporation ang tukoran og duha ka medium rise nga adunay lima ka andana.
Mokabat sa P200 milyones ang gigahin sa kagamhanan sa siyudad sa proyekto diin unahon sa pagtukod ang duha ka edipisyo.
Gipasabot ni Mayor Chan nga dili libre ang maong housing unit nga maangkon sa mga benepisaryo tungod kay datahan kini og P3,000 matag bulan.
Sa unang lima ka bulan ang lokal nga kagamhanan adunay ihatag nga P1,000 nga subsidy sa matag benepisaryo.
Gitataw niya nga dili hinuon makasinati og problema ang mga benepisaryo sa ilang mga balayranan tungod kay mahimo man kining pabayran kun miyembro sa Pag-ibig Fund ang benepisaryo nga hingtungdan. (BANAT NEWS)