CEBU, Philippines — Bag-o na karon ang direktor sa kapolisan sa Lapu-Lapu City Police Office (LCPO) nga maoy hulip ni Police Colonel Elmer Lim nga gibalhin ngadto sa laing rehiyon nunot usab sa nag-ung-ong niining promosyon.
Si Police Lieutenant Colonel Christian Torres, tigpamaba sa LCPO miingon nga si Police Colonel Noel Flores nga kasamtangan karon nga deputy regional director for operations sa Police Regional Office (PRO) 7 maoy mihulip niini isip Officer-In-Charge.
Matud pa ni Torres nga pormal nga miasumer sa katungdanan si Police Colonel Flores niadtong Marso 25, 2024 ug si Police Colonel Lim atua madistino sa PRO-12 isip maoy chief of staff. Si Lim miasumer isip director sa LCPO niadtong Oktubre 2022 ug sa Oktubre 2024 pa unta mahingpit ang duha ka tuig niini nga maoy naandan nga gidugayon sa paghulip og opisyal.
Gipasabot ni Torres sanglit si Flores naglingkod man isip acting capacity gipaabot nga ang Senior Officer Placement Board sa Philippine National Police (PNP) sa Camp Crame mosumitir og tulo ngadto sa lima ka pangalan sa mga opisyal ngadto kang Lapu-Lapu City Mayor Junard "Ahong" Chan aron iyang pilian.