CEBU, Philippines — Nadakpan sa mga operatiba sa Carbon Police Station 5 sa Cebu City Police Office (CCPO) ang usa ka 30-anyos nga babaye atol sa ilang buy-bust operation sa sitio Bato, Barangay Ermita, Siyudad sa Sugbo.
Ang dinakpan mao si Mae Ann Maravillon Galupo alyas MARVS, usa ka High Value Individual ug residente sa naasoy nga dapit ug giingong miyembro sa Junnel Nudalo Drug Group.
Nakuhaan kini og 105 gramos sa gituohang shabu nga nagkantidad og P714,000 ug ubang drug paraphernalia.
Duha ka semana nga gimonitor sa kapolisan ang suspek human makadawat ug kasayuran sa illegal nga kalihukan niini nga matud pa makabaligya og 100 gramos sa gituohang shabu kada semana. Samtang sikop ang usa ka 34 anyos nga High Value Individual sa buy-bust operation sa mga sakop sa City Drug Enforcement Unit sa Mandaue City Police Office sa may F.E Zuellig St, Barangay Subangdaku Mandaue City niadtong Lunes sa gabii. Ang nasikop naila nga si Jimmy Dayono, alyas Inggoy, taga Barangay Subangdaku sa maong dakbayan. Nasakmit gikan sa dinakpan ang 55gramos sa gituohang shabu nga mobalor og 374mil ka pesos ug buy-bust money. Gikatahu nga ang dinakpan nalambigit sa negosyo sa illegal drugs kansang source anaa sulod sa bilangguan. Samtang ang kapuyo niini nasikop usab tungod sa kalambigitan sa illegal nga drugas niadtong March 11, 2024 ug kini ang nitug-an nga si Inggoy, nalambigit usab sa ginadili nga drugas. Romeo D. Marantal/Rowena D. Capistrano, MEL BANAT NEWS