CEBU, Philippines — Patay ang usa ka polis human kini gituohang aksidenteng naunay sa iyang armas diha sulod sa pansayan sa iyang tindahan sa Purok Kolo, Barangay Jaclupan, Dakbayan sa Talisay kagahapon sa kaadlawon.
Ang namatay mao si PSSgt. Reymund Baynos, 33, taga Purok Tugsa, Campo 4, Barangay Manipis sa maong dakbayan.
Nadestino si Baynos sa Provincial Drug Enforcement Group (PDEG) sa Police Regional Office (PRO-6). Si Police Lt. Col. Wayne Magbanua, hepe sa kapolisan sa Talisay nagkanayon nga nakadawat sila og tawag labot sa panghitabo.
Ang mga niresponde nga polis nakakita ni Baynos nga nagkadugo diha sulod sa pansayan nga adunay samad pinusilan habig sa walang bahin sa ulo.
Nakuha sab ang .9mm nga pusil nga gituohan nga iya sa namatay.
Ang pagumangkon sa namatay nitug-an sa mga polis nga nakainom ang uyoan ug nag-testing sa iyang pusil sud sa pansayan. Sunod nalang niyang nadungog ang pagboto sa armas.
Ang sakop sa Emergency Management Service (EMS) nihiling ni Baynos apan wala na kini magginhawa.
Ang kapolisan padayon nga naghimo og dugang imbestigasyon kabahin sa maong hitabo. (BANAT NEWS)