CEBU, Philippines — Gipadakop sa asawa ang iyahang bana ug ang giingong babaye niini human ang duha iyahang nasakpan nga na check-in sa usa ka pension house diha sa Barangay Ermita, Siyudad sa Sugbo niadtong Marso 10, 2024 sa alas 2 sa hapon.
Sa report sa Carbon Police Station, ang 57-anyos nga asawa nga residente sa Barangay San Nicolas miadto sa police station ug nagpatabang kay naay nakatug-an niya nga ang iyahang 53-anyos nga bana mi-check sa usa ka pension house kuyog matud pa ang babaye niini nga 51-anyos nga molupyo sa Barangay Tunghaan, Lungsod sa Minglanilla.
Gikuyogan sa kapulisan ang asawa ug pag-abot sa pension house positibo nga naa didto ang iyahang bana ug ang gialegar nga kabit niini. Naaktuhan sulod sa kwarto ang bana ug ang giingong babaye niini hinoon nagsul-ob na sa ilang mga sapot ang duha.
Sa impormasyon nga gihatag sa kapulisan giingong dili kini ang unang higayon nga namamaye ang bana, nahitabo kini sa nanglabay nga katuigan kadtong gagmay pa ang ilang anak apan iyaha rang gipasaylo. Apan karon nga dagko na ang ilang mga anak desidido na ang asawa nga iyahang ipapriso ang iyahang bana ug ang babaye ning higayona. Nasayran nga kaila ra sa bana ang matud pa kabit niini sanglit pareho ra sila og lugar nga gitrabahoan. – IBM BANAT NEWS