CEBU, Philippines — Patay sa pagpamusil ang usa ka 26 anyos nga lalake diha sa Andres Abellana L. Bacayo Extension, sitio Guadario, Barangay Guadalupe, siyudad sa Sugbo, alas dose pasado sa tungang gabii sa Marso 7, 2024.
Ang biktima giila nga si Ralph Ivan Taborada, residente sa sitio Kanaas, Barangay Guadalupe ning siyudad.
Daling girespondihan sa Guadalupe Police Station ang ilang nadawat nga alarma sa pagpamusil ug dihang niabot sa dapit naabtan ang biktima nga nagbuy-od nga nagkadugo.
Nakabaton ug samad sa iyang ulo ang biktima nga gituohang maoy hinungdan sa iyang kamatayon.
Nigawas sa imbestigasyon sa kapolisan nga ang biktima giingong duna untay ikatagbo sa naasoy nga dapit apan kalit miabot ang nag-inusara nga mamumuno nga nipusil sa biktima.
Ang mga otoridad nagtuo nga gitumbok ang suspek ilabi na nga bag-o pa lang kini nakagawas sa prisuhan gumikan sa pagkalambigit niini sa illegal nga drugas.
Gisusi na karon sa kapolisan ang posibilidad nga may kalabutan sa illegal nga drugas ang motibo sa krimen. (BANAT NEWS)