CEBU, Philippines — Niabot ngadto sa 1, 582 ka kilo nga bangus ang na-harvest sa mga miyembro sa Pilipog Fisherfolks Association, inubanan ni Cordova Mayor Cesar “Didoy” Suan niadtong, Biyernes, Pebrero 9, 2024.
Tipik kini sa gipahigayon nga fishery livelihood project gikan sa Bureau of Fisheries and Aquatic Resources kun BFAR.
Base sa post ni Mayor Didoy Suan sa iyang facebook page, ang na bingwit nga 1, 582 ka kilo nga bangus gibaligya ngadto sa tag 150 kada kilo diin naabot sa PHP 237, 300 ang halin sa isda.
Matud pa ni mayor Suan nga tungod usa man kini ka livelihood program, ang kapunungan sa Pilipog Fisherfolks Association makadawat og 40% sa halin sa mga bangus ug ang 60% niini mao usab ang maangkon ug bahinon sa mga miyembro nga naghago ug nagtrabaho sa mga fish pens.
Kahinumdoman niadtong Nobiyembre 17, 2023 si Mayor Didoy unang nanghatag sa 8,000 ka bangus fingerlings gikan sa BFAR ngadto sa Pilipog Fisherfolks Association ug uban niini mao ang mga feeds alang sa tibuok nga first cycle sa bangus fingerlings.
Gawas kang Mayor Didoy misaksi sa pagpamingwit sila si Vice Mayor Boyet Tago, ang Pilipog Barangay Captain nga si Amy Ortiz ug mga konsehales, ingon man si Municipal Fishery Technician Mildrey Uy, ug ang mga personnel sa Department of Agriculture Bureau of Fisheries and Aquatic Resources. — MEL (BANAT NEWS)