CEBU, Philippines — Patay ang usa 24-anyos nga babaye human naaksidente sa dalan duol sa Umapad Elementary School sa U.N Avenue sa Barangay Umapad Mandaue City.
Ang nakalas naila na si Noemee Tayactac, residente sa Sitio Camansi, Barangay Pajo, Lapu-lapu City nga nagmaneho sa Honda ACB 125plate # 952 GZT.
Samtang ang drayber sa cargo truck nga nakabangga kaniya mao ang 31-anyos, taga B. Aranas Street, Dakbayan sa Sugbo.
Base sa inisyal nga imbestigasyon, nagbiyahe gikan sa C. Batiller Street access road ang trak padulong sa U.N Avenue samtang ang nakalas gikan sa U.N Avenue padulong sa Lapu-lapu City.
Pag-abot sa nahisgutang dapit gikatahong nagkadinasmagay ang duha hinungdan nakaangkon og kadaut ang babaye.
Ang biktima nga nakalas dali pa unta kini nga gidala sa tambalanan apan nakutloan kini sa iyang kinabuhi sa Mandaue City Hospital.
Ang driver sa trak kasamtangan nga gitanggong sa kapolisan ug gipaabot nga pasakaan og kaso ugmang adlawa. (BANAT NEWS)