CEBU, Philippines — Kagamhanan sa Dakbayan sa Sugbo nipahinumdum sa mga nagdumala sa pribadong mga parkingan nga dili magpalabi sa ilang pagpabayad sa parking niining panahon sa Pista Senyor.
Ang konseho sa siyudad niawhag Cebu City Transportation Office ug Business Process and Licensing Office nga ipatuman ang nalatid sa ordinansa alang sa tukmang bayad sa parking fee.
Ang maong pamahayag sa konseho subay sa resolusyon nga gipangamahanan ni Konsehal James Anthony Cuenco, chairman sa committee on communication and transportation sa konseho.
Base sa nalatid sa ordinansa adunay klase-klase nga kantidad sa bayranan diin ang class A parking mao kini ang limpiyo, sementado ug adunay pansayan diin P20 ang unang tulo ka oras ug P5 matag mosunod nga oras samtang sa class B ang bayad P10 sa unang tulo ka oras ug P5 matag mosunod nga mga oras.
Ang konseho nipahimangno sa tanan nga motuman ug mosunod sa nalatid sa balaod aron dili mag-atubang og silot. (BANAT NEWS)