MANILA, Philippines — Subling gipalihok sa kagamhanan sa Dakbayan sa Sugbo ang Task Force Disiplina og niawhag sa katawhan nga mosunod sa mga lokal nga policies may kalabutan sa kalimpyo, panglawas, kaluwasan, kalinaw ug traffic sa ilang panimalay og komunidad.
Ang Executive Director sa Peace and Order Program Pastor "Jongjong" Alcover III nipasabot nga ang marching order ni Cebu City mayor Michael Rama kanila mao ang pag-adto sa mga barangay og manoktok sa kabalayan.
Ilang himoon ang pagpangumusta sa pagpuyo sa mga tawo og mopahinumdum sa pagsunod sa tanang mga ordinansa sa siyudad.
Ang Taskforce Disiplina maoy kabahin sa tinguha ni mayor Rama sa pagtabang sa mga Sugbuanon aron sa pagkab-ot sa Singapore like Cebu City.
Kahinumduman ang mayor nimugna niini pinaagi sa Executive Order 4 niadtong October 1, 2022.
Ang TFD uban sa nagkadaiyang ahensya og volunteers magpatrolya sa kabarangayan og mopahinumdum sa katawhan nga mosunod sa mga balaod og ordinansa lakip sa maong executive order. (BANAT NEWS)