CEBU, Philippines — Usa ka lalaki nga giingong magsige og pakita og armas diha sa ilang dapit ang Igidakop sa mga sakop sa CIDG Cebu City Field Unit pinasikad sa Search Warrant nga giisyu sa korte tungod sa paghupot og dili lisensiyadong armas.
Ang operasyon gipangulohan ni Police Lieutenant Colonel Randy Korret diha sa panimalay sa suspek sa Sityo Panas, Brgy. Balirong, dakbayan sa Naga, Cebu. Huwebes sa gabii Disyembre 14,2023.
Ang pag patuman sa searck warrant ubos sa Flagship Project sa CIDG nga "OPLAN PAGLALANSAG OMEGA" sa PNP.
Ang dinakpan giila nga si Jovito Lapesigue Alvarez , 45 anyos ug nagpuyo sa maong dapit. Base sa report sa otoridad nakadawat sila og impormasyon nga ang dinakpan gikatahong magdaladala sa iyang walay lisensya nga armas sa gawas sa iyang pinuy-anan ug usahay magpabuto niini diha sa improvised firing range diha sa ilang lugar.
Human makompirmar ang report gilusad dayon ang operasyon pinasikad sa search warrant nga giisyu sa RTC Branch 76 sa Naga City, Cebu.
Atol sa operasyon nasakmit gikan niya ang usa ka kalibre 45 nga pistola adunay magazine ug pito ka bala. Ang dinakpan uban sa mga nasakmit nga mga ebidensiya gidala sa buhatan sa CIDG Cebu City Field Unit alang sa tukmang disposisyon sa dili pa ibalik ang Search Warrant ngadto sa nag-isyu nga korte.
Kasong paglapas sa R.A. 10591 ang giandam batok sa dinakpan.— IBM (BANATNEWS)