CEBU, Philippines — Nalutsan og warrant of arrest human nakitaan og igong basihan sa Toledo City Prosecutors Office nga ipasaka ngadto sa korte ang kasong graft batok sa City Legal Officer sa Dakbayan sa Toledo base sa reklamo sa usa ka construction company.
Ang gikasohan mao si Atty. Hazan Bargamento kinsa nalutsan og warrant of arrest gikan ni Toledo City RTC Branch 29 Presiding Judge Ruben Fermin Altubar penetsahan niadtong Nobiyembre 16, 2023 nga dunay piyansang P90 mil.
Si Bargamento gipasanginlan sa usa ka Novo Dalapo, usa sa mga contractors sa mga proyekto sa Toledo City infrastructure projects , nga kini nakalapas sa Republic Act 3019 o Anti-Graft and Corrupt Practices Act of 1960.
Base sa complaint sheet, si Dalapo maoy nakadaog sa bidding sa duha ka proyekto sa siyudad nga tukoron sa Barangay Poblacion ug sa sanitary landfill sa Barangay Puting Bato nga mosuma-total tanan og P5,939,138.12.
Matud pa sa reklamo, si Bargamento maoy chairman sa Bids and Awards Committee (BAC) apan giingong namugos nga siya, kinsa usa sab ka Notary Public, mao pud ang mo- notaryo sa mga kontrata bugti sa 5-porsiyentong “notarial fee” bisan giinsister nila Dalapo nga ang ilaha nalang kaugalingong abogado ang mohimo niini aron makamenus sila sa gastos.
Matud sa pasangil, tuyo nga gilangaylangay ni Bargamento ang paghatag sa kontrata maong nisugot nalang sila sa gusto niini.
Apan sa iyang tubag sa mga pasangil ug akusasyon pinaagi sa counter-affidavit, si Bargamento miingon nga ang mga akusasyon batok kaniya hinimo-himo ra aron mobawos kay makadaghan nang napildi sa mga biddings ang maong reklamante bisan og nagpalaban pa kini og mga impluwensiyadong tawo.
Apan ang piskalya mas misentro ilang imbestigasyon kun tinuod ang pasangil nga nangayo og 5-porsiyento nga gipaagi lang kunohay nga ‘notarial fee’ si Bargamento subay kini sa gipanumpaang pamahayag sa kapuyo ni Dalupo nga si Cerinia Apurado kinsa mao sab ang finance officer sa maong kompanya.
Ang piskalya miingon nga adto nalang sa korte husayon kun tinuod nga nakalapas sa Section 3 (b) sa RA3019 si Bargamento.
Ang resolusyon gipirmahan ni Assistant City Prosecutor Milagros C. Lequigan-Piol nga giaprubahan ni City Prosecutor Raul Cesar C. Bajarias. (CEBU NEWS)