CEBU, Philippines — Gihangyo ang mga ambulant vendor sa Dakbayan sa Talisay sa taga Ecological Solid Waste Management (ESWM) nga hipuoson ang ilang kauglingong basura.
Kini aron dili makatampo sa pagkabara sa mga kanal sa siyudad.
Si Edwin Nierves, operations head sa ESWM nagkanayon nga ang mga ambulant vendor gihangyo na daan nga mopadaplin sa ilang mga lamesa aron mahatagan og ka agian ang mga tawo.
Gitugotan ra sila sa pagpamaligya ilabi na diha sa Barangay Tabunok apan gihangyo usab ang maong mga vendor nga limpyohan ang ilang palibot. Matud ni Nierves nga ang dili motuman niini mahimo nila nga hatagan og kahigayonan apan kong masupak pa gihapon ang vendor o dili motuman sa hangyo ipatuman nila ang lagda sa siyudad.
Sayo pa, ang mga mamaligyaay diha sa daplin sa karsada ang gilaoman nga modaghan tungod sa holiday season. — BDB (BANATNEWS)