CEBU, Philippines — Usa ka kalabira sa tawo ang nakuykoyan sa construction site sa Sitio Upper Linao, lungsod sa Minglanilla niadtong Miyerkules sa alas 3 sa hapon.
Si Christian Villanueva Iñego, site engineer sa kontraktor sa proyekto maoy nagpahibawo sa kapolisan sa ilang nadiskubrehan human nakuykuyan kini sa ilang backhoe operator nga si Ruel Mondrano.
Matud pa sa kapulisan, unang nabantayan sa operator ang jersey sa gilawmon nga 1.2 metros, wala lang niya kini panumbalinga apan sa padayon niyang kubkob sa yuta naapil na og kahabwa ang mga bukog, boxer shorts, baller, face towel ug black belt.
Si Police Staff Sergeant Xyrus Illustrisimo sa Minglanilla Police naa karon sa bone chamber sa lungsod aron kun dunay tagtungod dunay masugdan dayon ang DNA testing.
Apan si Konsehal Ricky Luza sa Barangay Maghaway, Syudad sa Talisay nipahibawo nga ang iyang silingan nga usa ka inahan dali nga miila sa senina o jersey nga nakit-an.
Matud pa ni Luza nga Jolan Tapales ang pangalan sa batan-on nga gituohang nanagiya sa maong bukog, ug pito ka tuig na kini nga nawagtang.
Matud pa nagpa blotter na kaniadto ang pamilya ni Tapales sa Talisay City Police sa iyang pagkawala. Wala sila magtuo nga karon pa kini nila makit-an.
Si Luza mitambag sa inahan ni Tapales nga moadto sa buhatan sa kapolisan sa Talisay aron makig-alayon sa Minglanilla Police. — IBM (BANATNEWS)