CEBU, Philippines — Gikondenar sa Pilipinas kagahapong adlawa ang dungan nga pagatake sa militanteng Palestinians nga Hamas didto sa Gaza Strip nga mikalas og daghang mga Israelis apil na mga sibilyan ug kaliboang pamilyang Israelis ang gi-hostage.
Sa gipagawas nga pamahayag sa Office of President si Presidente Ferdinand “Bongbong” Marcos Jr. sa iyang kinasingkasing nga pahasubo ngadto sa mga pamilya sa mga nakalas sa giyera tali sa kasundalohan sa Israel ug mga Hamas.
“The Philippines condemns the attacks, especially against civilian populations,” pamahayag pa sa Office of the President.
Matud pa sa gobiyerno sa Israel, sobra sa 200 ka Israelis ang namatay sa dihang gilusad ang air, sea ug land assault sa mga armadong Palestinians nga gidunganan sab sa pagpaulan nila og dos mil ka mga rockets padung sa nagkadaiyang siyudad sa Israel.
Ang Israel maoy dunay pinaka-moderno ug epektibong anti-missile batteries sa kalibotan, apan tungod sa kadaghan sa missiles nga gitira kanila, bisan ang ilang air-defenses wala makapiog maong dunay mga missiles nga nitugpa gyud sa mga targets nga ang kadaghanan mga nahimutangan sa mga sibilyan. Si Israeli Prime Minister Benjamin Netanyahu misaad nga bungkagon sa Israel ang mga gitagoan sa Hamas sa Gaza Strip. Ang Israel mibawos dayon pinaagi sa airstrikes sa mga nailhan nilang kampo ug headquarters sa mga lider sa Hamas. Base sa report, gibanabanang 232 ka Palestinians ang namaytay sa unang mga minutos sa bawos sa Israel.
Ang Hamas usa ka militanteng organisasyon sa mga Palestinians nga nanumpang ilang papahawon sa Palestine ang Israel. Giporma kini kaniadto ni anhing Palestinian leader Yassir Arafat.
“….the Philippines understands the right of states to self-defense in the light of external aggression as recognized in the United Nations Charter,” dugang pa sa OP.
Sa briefing kagahapon ni Israeli Ambassador Ilan Fluss mipadayag nga gipaabot nilang kondenahon sa kalibotan, apil niini ang Pilipinas ug suportahan ang baruganan nga dunay katungod ang usa ka nasud nga panalipdan ang kaugalingon pinaagi sa pagbawos ngadto sa mga miatake kanila.
“In this moment of anguish, we call on our friends and allies to express strong support for Israel and to condemn these terror attacks by Hamas,” matud pang Fluss.
Naghimo na sab og koordinasyon ang Pilipinas ngadto sa mga otoridad sa Israel alang sa kaluwasan sa gibanabanang kapin 3 mil ka mga Pilipino nga nagpuyo o nagtrabaho didto matud pa sa Presidential Communications Office.
“The President has instructed the Department of Migrant Workers and the Overseas Workers Welfare Administration to locate and account for all overseas Filipino workers and their families in Israel,” matud pa sa PCO.
Ang embahada sa Pilipinas didto sa Tel Aviv kasamtangan karong nagberipika sa report nga dunay daghang mga Pilipino nga naabtan sa mga Hamas didto sa Gaza ang ilang gi-hostage kauban sa mga Israelis. — /IBM (BANAT NEWS)