CEBU, Philippines — Itugyan sa Minglanilla Police Station ngadto sa korte ang akusado nga gidakop human pinasikad sa alias warrant of arrest sa kasong murder aron sila nay modeterminar kung siya ba gyud ang suspek nga gipangita sa balaod.
Una niini, si Salvador Tapic Paragoso ang gidakop sa kapolisan samtang kini nagkuha og police clearance sa Minglanilla Police Station niadtong adlaw nga Lunes.
Ang tig-issue sa police clearance ug ang warrant server miduol sa hepe nga si Police Captain Kalvin Jomari Golitod nga dunay problema sa rekord ni Paragoso kay na-‘hit’ kini.
Gihatag sa warrant server ang warrant of arrest nga na-retrieve niini sa e-warrant ug gikonsulta sab kini ni Golitod sa Provincial Investigation and Detection Management Unit (PIDMU) nga mimando kaniya i-serve ang warrant of arrest sanglit nag-match ang impormasyon sa warrant sa ID nga gipakita sa akusado.
“Sa amin valid arrest po iyun, meron tayong warrant of arrest at nag-match po siya doon sa identity niya nakalagay doon sa warrant of arrest,” pasabot ni Golitod.
Sa impormasyon nga gihatag sa kapulisan, ang akusado matod pa nalambigit sa pagpanunggab gamit ang ice pick niadtong buwan sa Hulyo tuig 2010.
Dunay duha tawo nga napasakaan og kaso ug sila napriso apan na-dismiss kay nakita sa husgado nga wala sila’y sala.
Si Paragoso giingong wala motambong sa mga hearings maong wala madungog sa korte ang iyang habig hinungdan nga mipagawas og warrant of arrest ang korte.
Ang alias warrant giluwatan sa Regional Trial Court (RTC) 7th Judicial Region, Cebu City nga gipetsahan niadtong tuig 2020.
“Na-served po ito pero hindi po nila nahanap yung suspect…Ito po yung hawak namin ngayon ay alyas warrant of arrest, pangalawang issue na ito ni court,” ni Golitod pa.
Sa post sa Facebook page sa Local Government Unit of Minglanilla si Mayor Rajiv Enad miingon nga nakaabot sa iyaha ang nahitabo. Gimando niya sa iyang mga abogado ingon man sa Barangay Kapitan sa Tungkop sa pag-imbestigar sa maong hitabo.
“Unsa ang gibasehan sa pagdakop ug ang warrant of arrest nga gi gamit. Mga igsuon natong Tungkopanons, we will look into this,” tipik sa post sa mayor.
Ang tigpamaba sa Police Regional Office (PRO)-7 Lt. Col. Gerard Ace Pelare miingon nga dunay imbestigasyon nga gihimo ang Cebu Police Provincial Office (CPPO) sa hitabo.
Apan iyang giklaro nga igo rang nihimo sa ilang trabaho ang kapolisan sa Minglanilla.
Gipasabot sab niya nga sa warrant of arrest walay nakabutang didto kung Sr. o Jr. ang subject, apan pareho gyud og ngalan ang naa sa warrant ingon man ang ID nga gipakita sa akusado.
Ang mga kabanay ni Paragoso nisaysay nga mistaken identity lang ang dinakpan ug daghan lang kini og kapareha og pangalan.— Gabriel Bonjoc, IBM (BANATNEWS)