CEBU, Philippines — Kritikal ang kahimtang sa usa ka binilanggo human dunggaba sa laing binilanggo niadong Lunes diha Lapu-Lapu City Jail.
Ang biktima giila nga si Dennis Dumael, hingkod ang panuigon, nabilanggo sulod sa walo ka tuig tungod usa kaso nga pagpanglugos ug giingong trustee sa Lapu-Lapu City Jail.
Si Dumael nakaangkon og 30 ka samad dinunggaban sa lawas ug giingong ang samad dinunggaban sa tiyan niini ang hinungdan nga anaa kini karon sa kritikal nga kahimtang.
Ang suspetsado mao si Darwel Tero, hingkod ang panuigon, kaubang binilanggo sa biktima.
Si Jail Officer One Dennis Balabat nagkanayon nga nahitabo ang maong pagpanunggab dihang mopahigayon unta og head count sa mga binilanggo ang jail personnel on duty.
Ang biktima isip trustee maoy gidestino sa on duty personnel sa pag-abli sa paggawas ug pagpaingon sa pagsulod sa pultahan sa maong jail facility.
Samtang ang biktima nag-abli sa pultahan giingong kalit lang nga nidasmag si Tero ug gidunggab niini ug hait nga butang si Dumael sa makadaghang higayon.
Matud ni Balabat nga ang pagpangabubho sa suspetsado ngadto sa biktima maoy usa sa mga anggulo karon nga ilang gisubay nga hinungdan sa pagpanunggab.
Giingong nitumaw ang pagpangabubho ni Tero dihang nakadawat usab kini og mga kasayoran nga ang biktima kanunay nga magkontakay ug sa iyang asawa.
Gibutyag ni Balabat nga ang asawa sa suspetsado taud-taod na usab nga panahon nga wala na nibisita sa iyang bana diha sa bilanggoan.
Si Police Lieutenant Colonel Christian Torres, hepe sa City Intelligence Detection and Management Unit (CIDMU) sa Lapu-Lapu City Police Office (LCPO) nagkanayon nga nipahigayon sila og greyhound operation diha sa nahisgutang pasilidad niadtong Septiyembre 16, 2023 apan wala sila makakuha og mga kontrabando gawas lang sa hait nga toothbrush, kahoy ug alambre. (BANAT NEWS)