CEBU, Philippines — Mga biyuda sa mga rebeldeng Muslim nga napatay atol sa mga engkwentro sa panahong wala pa mobalik ang ilang pundok sa sabakan sa gobiyerno pipila ka mga dekada na ang nakalabay gihatagan og tag P50 mil sa gobiyerno.
Ang maong kwarta magsilbing ilang puhonan aron sila makapanginabuhi pinaagi sa Bangsamoro government sa Cotabato province. Sila si Gov. Emmylou Taliño Mendoza, mihangop sa gihimo sa Bangsamoro government pagtabang sa 200 ka mga biyuda aron ilang magamit sa ilang panginabuhian. Ang payout anha gihimo sa Barangay Manarapan sa lungsod sa Carmen sa Cotabato.
Kini gipasiugdahan sa mga opisyales sa Bangsamoro Autonomous Region in Muslim Mindanao (BARMM) pinangulohan ni Regional Local Government Minister Naguib Sinarimbo. Ang mga benepisaryo mga molupyo sa Kabacan ug Carmen kun diin init ang panagsangka sa mga tropa sa gobiyerno ug mga rebeldeng Muslim niadtong mga tuig 1970 hangtud 1990s.
Usa kanila si Zukria Abas, kansang bana nga si Samsudin napatay sa kasundalohan niadtong 2014 sa Pikit sa Cotabato.
Upat ka buok ang ilang anak, matud pa niya magamit niya ang P50,000 pagsugod sa iyang small-scale rice and corn trading business sa ilang barangay. “I will tell my mother to use the money she received as down payment for a motorcycle for a tricycle I can drive around to earn money during non-school days,” matud pa usab sa 21-anyos nga tinun-an sa kolehiyo nga si Madzid Sandiale. Ang amahan ni Madzid nga si Tangan napatay sa mga sundalo sa engkwentro sa Pagalungan sa Maguindanao del Sur niadtong 2003.
Si Sinarimbo namahayag sa mga biyuda nga ang BARMM, produkto sa 22 ka tuig nga peace talks tali sa Malacañang ug sa Moro Islamic Liberation Front, miila sa sakripisyong gihimo sa ilang mga bana aron maporma ang Bangsamoro government nga gihulma sa Malacañang ug MILF niadtong 2019 para sa mga Moro communities.
Dunay 63 barangays sa nagkalain-laing lungsod sa probinsya sa Cotabato ang ubos sa Administrative Region 12 nga nahimong kabahin karon sa BARMM core territory human sa gihimong plebisito niadtong tuig 2019.—Gikan sa Philstar.com/IBM (BANAT NEWS)