CEBU, Philippines — Opisyal nang natapos kagahapon ang filing sa certificates of candidacy (COC) alang sa Barangay ug Sangguniang Kabataan elections (BSKE) sa Oktubre, ang Commission on Elections (Comelec) niawhag sa mga kandidato nga magmabinantayon ug pasakaan og kaso ang mga kaatbang nga makalapas sa mga balaod sa eleksiyon.
Si Comelec Chairman George Garcia nagkanayon nga nagsalig sila sa pagkamabinantayon sa mga kandidato aron malikayan ang mga kalapasan sa eleksiyon, lakip na ang mga kalapasan sa anti-political dynasties sa mga kandidato sa Sangguniang Kabataan (SK).
Matud ni Garcia nga mohangop sila sa mga kandidato nga mopasaka og kaso nga disqualification sa ilang mga kaatbang nga kandidato sa SK o ni bisan kinsa nga interesadong partido batok sa mga paryente sa incumbent nga opisyales sa lokal o national.
Si Garcia nagkanayon nga gumikan sa kakuwang sa resources maglisod ang lokal nga poll offices sa pagdeterminar kong ang niduso og COC alang sa SK election adunay paryente nga incumbent nga napili isip mga opisyal sa lokal ug national.
Ug wala sila’y mahimo niini gawas sa pagdawat sa COC tungod kay walay impormasyon ang mga lokal nga buhatan sa Comelec kong ang maong kandidato adunay mga paryente nga incumbent nga opisyales.
Si Garcia nidasig sa mga kandidato nga mopasaka og reklamo batok sa ilang kaatbang nga kandidato kinsa nisuway sa paglapas sa SK Reform Act.
Kagahapon, gikataho sa Comelec nga niabot ngadto sa 1.3 milyon ang kinatibuk-ang gidaghanon sa niduso sa ilang COC.
Base sa partial consolidated report sa COC nga giduso mga alas 11:30 sa buntag kagahapon niabot ngadto sa 1,316,265 ang gidaghanon matud ni John Rex Laudiango, tigpamaba sa Comelec.
Ang maong gidaghanon naglangkub kini gikan sa La Union, Aurora, Bohol, Cebu, Siquijor, Zamboanga Sibugay, Sultan Kudarat, ug Lanao del Sur kinsa wala pa mopadala sa ilang reports.
Ang filing period sa COC alang sa Oktubre 30 nga BSKE nagsugod niadtong Agosto 28 ug mahuman unta sa Septiyembre 2. Apan kinahanglang lugwayan sa Comelec ang filing sa pipila ka mga dapit, apil ang National Capital Region (NCR) tungod sa grabeng pagbaha. Sa bisperas sa deadline, si Garcia nagkanayon nga daghan pa ang mga aspirant nga mo-file og COCs sa Manila ug gamay ra ang gidaghanon sa Quezon City, Caloocan, ug Las Piñas. Kadagahanan niini mga lalaki niabot ngadto sa 861,171 samtang ang mga babaye nga aspirants adunay 455,094 ang gidaghanon, 92,173 ang nagtinguha nga mahimong barangay chairperson samtang 690,531 ang gustong mahimong barangay council member.
Adunay 85,816 ka aplikante alang sa SK chairperson ug 447,745 ka aspirant sa SK council members. — /BDB (BANAT NEWS)