CEBU, Philippines — Padayon ang gihimong pagpangandam sa Department of Education Central Visayas alang sa nagsingabot nga Barangay ug Sk Elections karong Oktubre 30, 2023.
Sumala pa ni DepEd-7 Regional Director Dr. Salustiano Jimenez, nihimo na ang ilang ahensya ug tigum tali sa Commission on Elections aron tukion ang may kalabutan niini.
Matud pa ni Jimenez, lakip sa ilang gituki sa tigum mao ang pag-ila sa mga board of tellers nga mga magtutudlo nga moserbisyo karong piniliay.
Gipaabot pa sa ilang ahensya ang final list gikan sa comelec sa mga board of tellers, ilabi na nga dunay mga kwalipikasyon nga gitan-aw ang COMELEC alang niini, lakip na niini mao ang pagtino kun duna bay mga paryente ang magtutudlo nga magpapili sa umaabot nga piniliay.
Walay pagsupak si Jimenez sa pagpahigayon sa eleksyon ngadto sa mga mall basta seguroon sa ahensya ang kaluwasan sa mga magtutudlo ug mga botante.
Samtang andam na ang Commission on Election (COMELEC) sa Dakbayan sa Talisay alang sa pagdawat sa Certificate of Candidacy (COC) sa magpapili sa Sangguniang Kabataan (SK) ug barangay elections.
Si Josef Buac, election assistant nagkanayon nga anha sila sa people’s hall mag opisina aron dako og hawan.
Pero kadto lang mga kandidato ang pasudlon ug ang ilang pamilya apan ang mga supporters anha lang kutob sa lobby.
Matud pa ni Buac nga andam na sila sa tanan nga gamiton alang sa mao nga petsa.
Ang pagduso sa COC magsugod sa Agusto 28 hangtud sa Septembre 2 ning tuiga.
Bukas sila bisan paman og adlaw nga holiday ingon man Sabado.
Gilauman nga daghan ang modagsa sa unang adlaw sa pagduso sa COC kini ilabi na nga holiday. (BANAT NEWS)