CEBU, Philippines — Gitapos na kagahapon sa udto ang 5th National Conference on the Ministry of Spiritual Liberation and Exorcism nga gipahigayon sa IEC Convention Center nga gitambongan sa dili mominos 400 ka mga participants nga gilangkoban sa mga kaparian ug layko, gikan sa lain-lain nga dapit sa Archdiocese ug Diocese sa Pilipinas. Ang maong kalihukan gisugdan niadtong Lunes Aug 21, 2023 hangtud kagahapon sa udto adlaw nga Biyernes Aug 25.
Kini ang gibutyag ni Fr. Monico Catubig, Cebu Archdiocesan Prison Apostolate ug usa sa mga exorcist sa Archdiocese of Cebu.
Matud pa ni Catubig ang maong kalihukan subay unta sa 500 years of Christianity sa Archdiocese of Cebu, apan tungod sa Covid-19 pandemics hinungdan nga kini nauktaba ug karon pa nahigayon dinhi sa Sugbo tungod kay kita man ang Cradle of Christianity.
Sumala pa ni Catubig, ang tumong ug tuyo sa maong kalihukan aron mapalawman ang kahibalo sa trabaho sa panuway, sama sa mga panambal diin nagtuo ta maayo apan aduna diay duwa sa panuway niini sama sa limbong.
Dugang pa ni Catubig, sila sa Archdiocese aduna pa silay napulo ka pari nga exorcist ug anaay mga potential nga mahimong exorcist ilabi na sa mga nangapil sa tigum.
Gibutyag ni Catubig, aduna usab silay mga hagit ilabi na ug dili sila committed tungod kay aduna man usab mga himoon ang panuway.
Si Catubig, niawhag sa katawhan nga kung aduna silay problema ug kinahanglan ug tabang ilabi na kung aduna silay mga habak-habak ug anting-anting sa pagduol sa Archdiocese of Cebu Office of Deliverance and Exorcism kay andam sila nga motabang. IBM (BANATNEWS)