CEBU, Philippines — Upat ka mga lalaki, apil niini ang kanhi nadakpan na kaniadto tungod sa ilegal nga drugas ang nasikop sud sa drug den atol sa buy-bust operation sa mga tinugyanan sa Philippine Drug Enforcement Agency kon PDEA-7 ug Cebu City Police Office Station 10 sa may Sitio Balagon, Barangay Labangon ning Dakbayan sa Sugbo.
Ang nasikop nga subject sa operation ug drug den maintainer naila nga si Rebona Fuentes, alyas Marilou, 70, nga nadakpan na kaniadtong Enero 2020 sulod sa usa ka drug den.
Kauban sa nadakpan sa maong operasyon ang giingong iyang mga parokyano usab nga sila si Linjie Jabel, 30, factory worker; Noel De Vera, 48, pedicab driver; ug Francisco Ebonalo, 25, pedicab driver.
Nasakmit gikan sa mga dinakpan ang 13 ka putos sa gituohang shabu nga motimbang og 15gramos nga mobalor og P102 mil, plastic nga dunay agi sa shabu, buy-bust money, P140 nga kwarta ug kagamitan sa pagamit sa ginadili nga drugas.
Sumala pa ni Leia Alcantara, tigpamaba sa PDEA-7, si Fuentes nasikop niadtong Enero 2020 sa usa ka drug den ug nakombikto niadtong Nobiyembre 2020.
Apan human kini nakagawas, nitumaw og balik ang pangalan niini hinungdan nga gipanid-an siya sa PDEA-7 hangtud nakompirmar ug gilusad ang operasyon.
Ang mga dinakpan nagtingkagol na karon sa lock-up Jail ug gipaabot ang pagpasang-at ug tukma nga kaso nga kalapasan sa Sections 5, 6, 7, 11, and 12, Article II of RA 9165.
Gihangop sa kadagkuan sa PDEA7 ang pagkabungkag sa drug dens tungod kay mao kini ang breeding grounds sa kagubot ug kriminalidad nga makaguba sa kalinaw ug kahapsay sa komunidad. IBM (BANATNEWS)