CEBU, Philippines — Dili ra maapektohan ang dagan sa trapiko sa Lungsod sa Minglanilla bisan pa sa mga kalingawan nga gipahigayon subay sa ilang kapistahan.
Kini maoy gibutyag ni Glenn Antigua, pangulo sa Minglanilla Traffic Commission (MITCOM).
Matud ni Antigua nga bisan og daghan ang kalihokan nga gipahigayon apan anaa ra kini gipahigayon sa interior nga lugar sa lungsod ug dili sa nasudnong karsada.
Sayo pa, si Mayor Rajiv Enad nideklara nga special non-working holiday sa Agosto 22 niining tuiga alang sa paghatag og higayon sa pagselebrar sa kapistahan sa ilang patrona Immaculate Heart of Mary.
Nagkanayon si Antigua nga full force ang ilang mga sakop sa pagmando sa trapiko.
Giklaro ni Enad nga wala una siya nitugot sa iyang sakop nga maka-leave o makabakasyon aron mahatagan og pagtagad ang kadalanan.
Lakip nga motabang kanila sa paghatag og seguridad sa katawhan mao ang 343 ka sakop sa kapolisan nga gi-augment sa lungsod gikan sa Police Regional Office (PRO)-7.
Samtang ang Dakbayan sa Carcar nangandaman na sa trapiko sa adlaw nga ipahigayon ang Pasigarbo sa Sugbo diha sa ilang lugar.
Base sa Sidlak Carcar Facebook page gipahibawo nga magpahigayon sila og dry run sa trapiko karong adlawa.
Sugdan kini sa alas 10:00 sa buntag hangtud na sa alas 12:00 sa udto.
Ang mga pasaheroan nga sakyanan nga gikan sa Siyudad sa Sugbo pabilin nga moagi sa highway hangtud sa Awayan dayon lahos sa Biniya ug mo left turn.
Ang mga light ug private nga sakyanan mo divert sa Katugasan Perrelos via Can-asujan dayon mo right turn pag-abot sa Liburon dayon left turn paingon sa Binoya via Sitio Lomboy.
Samtang ang Lomboy road one way ra ug dili kini pasudlan gikan sa Binoya.
Ang gikan sa Barili ug Sibonga mo left turn sa bypass road hangtud nga molapos sa Awayan kay ang rotunda dili pa agi-an.
Ang mga ambulansiya ra ang makasulod sa mga gisira nga karsada.
Adunay mga traffic enforcer sa kadalanan nga mo assist sa mga sakyanan. — / BDB (BANAT NEWS)