CEBU, Philippines — Padayon ang pagmonitor sa kapolisan sa Dakbayan sa Talisay sa kadagatan ug kasapaan karon nga dili pa maayo ang dagan sa panahon.
Si Police Lt. Col. Randy Caballes, hepe sa kapolisan nibutyag nga nakig-alayon sila sa taga City Disaster Risk Reduction and Management Office (CDRRMO).
Si Caballes nitataw nga adunay mga nangaligo sa dagat hinungdan nga ilang gipahimangnoan nga dili mokumpyansa.
Linaw ra hinuon ang kadagatan pero ang gikabalak-an mao ang kalit unya nga pag unos.
Hinuon andam ra ang ilang search and rescue team kung pananglit adunay di maayong panghitabo.
Ang mga residenti duol sa kasapaan gipabantay usab sa higayon nga mokalit pagsaka ang tubig.
Lakip sa gimonitor ang kabukiran ilabi na sa lugar nga dali nga modahili ang yuta.
Samtang sa laing bahin gipangtudloan sa angay nga buhaton ang mga manager ug gwardiya sa establisamento alang sa pagtubag og kalamidad ug emerhensya.
Ang mga sakop sa City Disaster Risk Reduction and Management Office (CDRRMO) nipahigayon og seminar workshop sa 22 ka manager ug gwardiya.
Ilang gilakip ang mga pribado sab nga tunghaan sa siyudad kay sila sab ang saligan sa seguridad sa mga tinun-an.
Si Joel Sisa, pangu sa Operation Department sa CDRRMO nibutyag nga ilang gipasabot sa mga manager ug gwardiya kung unsa ang ilang papel panahon sa kalamidad.
Matud pa niya nga mas maayo sab nga lihokon ang ilang relasyon o pakig-alayon sa mga opisyales sa barangay.
Ilang gihimo ang seasonal calendar sa pagsiguro nga walay dautang mahitabo ilabi na kun aduna silay mga kalihukan.
Ang kalihukan gihangop sab sa mga manager ug gwardiya isip dugang kaalam nga ipaambit sab sa magkinahanglan. —/MEL (BANAT NEWS)