CEBU, Philippines — Gipasidunggan sa Danao City ang 529 ka mga estudyante sa elementary hangtud sa highschool nga ni gradwar sa Alternative Learning System ALS niadtong Miyerkules, Hulyo 19, 2023.
Suma pa sa Danao City government pinaagi sa ilang Facebook page, ang Alternative Learning System (ALS) program nga giimplementar sa Department of Education (DepEd) nahimong instrumento aron sa paghatag og kahigayonan alang niadtong nag-atubang sa mga hagit sa kinabuhi ilabi na sa pag-angkon og pormal nga edukasyon.
Usa sa core values nga gipasigarbo sa Danao City mao ang knowledge o ang kahibawo diin ang ALS hingpit nga nahiuyon sa pasalig sa pagkat-on alang sa tanan.
Ang ALS Certificates of Completion nga nadawat sa mga ni gradwar giisip nga usa ka bunga sa pagkugi ug pagpursigi sa mga estudyanti nga naglangkub sa maong programa.
Uban sa maong seremonya mao ang pag-awhag sa tanan nga magpadayon bisan pa man sa mga pagsulay ug kakulian sa kinabuhi.
Si Danao City Mayor Thomas Mark “Mix” Durano nagkanayon nga angay gayod nga magpadayon sa pagkab-ot sa mga pangandoy, ug padayon sa pagsidlak, Danawanon.
Ang mahinungdanon nga gidaghanon sa mga ni gradwar sa ALS karong tuiga giisip nga nagpakita sa kalamposan ug ka epektibo sa programa sa Danao City nga nagtumong sa pagsuporta sa mga out-of-school youth ug adults sa pag-angkon og kahibalo ug kahanas pinaagi sa usa ka flexible learning system. — CNU Intern/MEL