CEBU, Philippines — Ang Department of Interior and Local Government (DILG) mopasidungog sa mga Sangguniang Panlungsod ug Sangguniang Bayan nga nagpakita sa kabag-ohan ug maayong gawi sa lokal nga legislation.
Ang DILG mopasiugda sa 2023 Local Legislative Award (LLA) sa ulahing bahin niining tuiga.
Si DILG Secretary Benjamin “Benhur” Abalos, Jr. nagkanayon nga ang tumong sa LLA 2023 mao ang pagsaulog sa maayo nga performance sa Sangguniang Panlungsod ug Sangguniang Bayan alang sa pagbuhat og mga lakang ug balaod nga nakatabang sa pagtukod og epektibo nga lokal nga administrasyon ug kalamboan gikan Hulyo 1, 2019 hangtud Hunyo 30, 2022.
Ubos sa DILG Memorandum Circular No. 2023-092, si Abalos nibutyag nga ang mga sanggunian i-evaluate gamit ang mosunod nga mga sukdanan nga mao ang pagtubag sa legislative agenda; pagbaton sa mga dokumento sa legislative; pagkaepektibo ug efficient sa performance sa sanggunian; legislative nga mga citation ug awards; ug pagpalambo sa kapasidad sa mga magbabalaod ug kawani.
Ang LLA gi-categorize sa provincial, regional, ug national level diin sa provincial evaluation ang city ug municipal nga mga sanggunian kinahanglang adunay 80 porsyento o mas taas nga overall performance rating aron makigkompetensiya sa regional level.
Samtang sa regional level, ang mga sanggunian nga adunay kinatibuk-ang score nga 85 porsyento pataas ang kwalipikado nga mosalmot sa national level. Ang mga mananaog sa provincial level makadawat og tropeyo ug kwarta gikan sa Philippine Councilors League (PCL) ug Vice Mayors League of the Philippines (VMLP) provincial chapters.
Ang ang mananaog sa rehiyonal makadawat og tropeyo ug kwarta gikan sa PCL ug VMLP regional councils ug plaque of commendation gikan sa PCL ug VMLP national offices.
Samtang ang national nga mananaog makadwawat og tropeyo ug kwarta gikan sa PCL ug VMLP national office ug mga kasosyo sa programa.
Ang awards committee pangulohan sa DILG, PCL ug VMLP uban sa mga miyembro gikan sa Department of Agriculture (DA), Department of Social Welfare and Development (DSWD), Department of Budget and Management (DBM), Department of Environment and Natural Resources (DENR) ug Philippine Chamber of Commerce and Industry (PCCI). — CNU Intern/BDB (BANAT NEWS)