CEBU, Philippines — Gihangop sa gatusan ka mga Oponganon ang gilusad sa Office of the Presidential Assistant for the Visayas (OPAV) nga medical, dental, legal ug feeding caravan nga gitawag og Bayan Bangon Muli (BBM) nga gipahigayon niadtong Sabado Hulyo 15, 2023 sa Lapu-Lapu City Sports Complex.
Si OPAV Undersecretary Terence Calatrava mipasalig atol sa iyang pagpamung nga mapadangat nila ang social services ngadto sa katawhan pinaagi sa paghatag og mga libreng serbisyo sa gobyerno.
Si Andy Bentulan, 62 anyos nga taga Basak Siyudad sa Lapu-Lapu usa sa nakahigayon sa pagpahimulos sa maong serbisyo pinaagi sa pagpaibot og ngipon ingon man nahatagan usab og libreng check-up sa iyang panglawas.
Naglakip sa libreng serbisyo nga napahimuslan sa mga Oponganon mao ang libreng pagpatupi, dental services, medical checkup, free legal advice ug uban pa.
Gihimo usab ang pag-apod-apod og lima ka kilong bugas sa 200 ka mga bata nga nagtungha.
Nitambong usab sa kalihukan si OPAV Assistant Secretary Antonio Veloso, Jr., Lapu-Lapu City Mayor Junard Chan, ug Lapu-Lapu City Lone District Representative Cindi King-Chan.
Si Lapu-Lapu City Councilor Annabeth Cuizon, chairperson sa City Council committee on social services miingon nga nalipay kayo sila sa maong matang sa mga serbisyo nga napahimuslan sa ilang mga constituents. — /MEL (BANAT NEWS)