CEBU, Philippines — Gipahibawo ni Talisay City mayor Gerald Anthony “Samsam” Gullas nga maagian na pagbalik ang karsada sa sitio Cruzan, Barangay Bulacao paingon sa Candulawan, Dakbayan sa Talisay.
Matud pa sa mayor nga mga alas 6:30 sa gabii niadtong Miyerkules nakumpleto sa pag abuno sa taga Department of Public Works and Highways (DPWH) ug Metro Cebu Water District (MCWD) ang karsada nga nahulpa.
Nihulpa kini dihang nangita sa buslot nga tubo ang mga sakop sa MCWD aron ilang ayohon.
Samtang sila nagkubkob sa kilid mihulpa na hinuon ang karsada nga adunay gilapdon nga walo ka metros ug walo sab ka metros ang gitas-on.
Ang mga residenti sa Candulawan adto una niagi lusot sa habig sa Barangay Bulacao, siyudad sa Sugbo.
Nahuman na kini sa pag-abuno ug gikatakdang sementohon na kini pagbalik.
Gipasalamatan ni mayor Gullas ang MCWD ug DPWH sa ilang paspas nga pagresponde sa hitabo. (BANAT NEWS)