CEBU, Philippines — Nagtingkagol sa prisuhan sa Minglanilla Police Station ang usa ka 28-anyos nga lalake nga giingong nanulis sa Gullas Drive, Barangay Tunghaan sa naasoy nga Lungsod pasado alas 3 sa kagahapon sa kaadlawon.
Giila ang dinakpan nga si Jonathan Yap, 28, residente sa Purok II, Barangay Tunghaan sa maong lungsod.
Ang biktima sa suspek mao si George Mongcopa, 27, residente sa Poblacion Ward II sa mao gihapong lungsod.
Sigon ni Police Captain Kalvin Jomari Golitod, Hepe sa Minglanilla Police Station kagahapon sa buntag dunay mi-report sa police station mahitungod sa tulis nga nahitabo sa nahisgutan nga lugar.
Ang suspek kalit miduol sa biktima nga nakig-inom sa iyang higalang si John Vincent Fajardo ug mideklarar og tulis.
Sa kahadlok sa biktima gihatag niya ang cellphone ug pitaka nga dunay sulod P800.
Daling miikyas ang suspek sakay sa motorsiklo apan gisundan kini sa biktima ug sa higala sakay sa ilang motor.
Matud pa sa inisyal nga pagikyas, milahos sa Dakbayan sa Naga ang suspek apan mi-u turn kini balik sa Minglanilla ug dihang naabtan sa duha nangayo sila og tabang sa mga tawo ug nanawag dayon og policse hinungdan nadakpan kini. Na-recover sa kapulisan ang pitaka apan wala na ang cellphone sanglit gilabay kini matod sa suspek.