CEBU, Philippines — Nagplano si Cebu City Councilor Jocelyn Pesquera nga moduso og proposal nga magsawo ang bike lane ug sidewalk alang sa mga dagko og pinili lang nga mga kadalanan sa pipila ka dapit sa Dakbayan sa Sugbo.
Matud ni Pesquera nga nasulod sa iyang huna -huna ang maong ideya atol sa iyahang pagbisita ngadto sa pipila ka mga dapit sa Europe sa niaging adlaw.
Nagkanayon si Pesquera nga alang sa mga dagkong dalan labing maayo nga magsawo nalang ang sidewalk ug bike lane pinaagi sa pagtunga niini. “Sa maong pamaagi, safe kaayo ang atong bikers”, ni Pesquera pa.
Patun-an pa ni Pesquera ang maong posibilidad ilabi na ang pag-ila sa mga dagkong dalan nga mahaom niini.
Ug kong mahatagan kini og katumanan butangan kini og nindot nga desinyo landscape aron makonsiderar kini nga usa sa mga nindot nga talan-awon nga sama sa ubang nasud.
Sa kasamtangang sitwasyon ang bike lanes dinhi sa dakbayan gipahimutang kilid sa kadalanan nga gipintalan og color green.
Sa laing bahin, gipatigbabaw sa Sugbo Bike Lanes Patrollers nga dili lang sila kutob sa pagsita apan lakip usab ang pag-edukar sa bikers alang sa responsableng pagbisikleta sa Dakbayan sa Sugbo.
Nagpadayon karon ang Mass Information Dissemination Campaign sa Bike Lanes Patrollers sa nagkadaiyang kadalanan sa dakbayan ug gisaysay nila ang kamahinungdanon sa pagparehistro sa mga biseklita, pagkuha og pagsunod sa mga lagda sa trapikob ug uban pa nga mga importante butang.
Nag-unang tumong sa kagamhanan nga masiguro ang kaluwasan sa tanan. (/BDB) (BANAT NEWS)