CEBU, Philippines — Nagpahinumdom ang Police Regional Office-7 sa kapulisan sa Central nga magmatngon gyud sa paghupot sa ilang armas dili lang sa actual operation apan bisan naa sa ilang balay.
Kini maoy pahinumdom sa PRO-7 tungod sa nahitabo sa kang Patrolman Emmanuel Cary Giangan nga nadestino sa Tuburan Municipal Police Station kinsa namatay human aksidenteng mibuto iyang armas ug naigo kini sa tiyan.
Gawas sa kapulisan, lakip sa giawhag sa kapulisan ang mga lisensiyadong naghupot og armas nga dili mokompiyansa ug importante ang presence of mind.
Si Police Lt. Col. Gerard Ace Pelare, tigpamaba ni PRO-7 Regional Director Brigadier General Anthony Aberin miasoy nga regular ang trainings ug seminar sa kapulisan sa safety gun handling kay dili man sila ipakatap sa field nga wala’y certificate nga sila proficient sa paghupot og armas.
Ang mga Patrolman dili isyuhan og armas kung dili sila makapasar sa gikinahanglan nga mga rekisitos sama sa gun safety trainings, certificate of proficiency.
“Kining nahitabo karon this was pure accident and we are very saddened about this and the PNP will again reiterate to the unit commanders to make sure nga ang atong regular training, firearms proficiency will be implemented as scheduled,” ni Pelare pa. (BANAT NEWS)