CEBU, Philippines — Usa ka lalaki ang gitabang human na-trap sa manhole didto sa Barangay Lipata, lungsod sa Minglanilla kagahapon sa buntag.
Si Mayor Rajiv Enad nipahibawo nga mga alas-9 sa buntag nakadawat og tawag ang Minglanilla Command Center gikan ni Kapitan Lino Ong kalabot sa ilang nakita nga usa ka kamot nga nigimaw sa manhole.
Dali nga miresponde ang Minglanilla Traffic Commission (MITCOM), Municipal Disaster Risk Reduction and Management Office (CDRRMO) ug ang kabumberohan.
Nakita sa mga niresponde ang usa ka lalaki nga giila nga si Jade Monreal, taga Sitio San Miguel, Barangay Linao, Syudad sa Talisay, na-trap kini sa ilawom sa maong manhole.
Wa na sila maglangay gibakbak nila ang manhole hangtud nga nakuha kini nga buhi. Way nasayod kun giunsa pagkahitabo nga nasulod kini sa maong manhole.
Ang mga nakaila ni Manreal nag-ingon nga aduna kini nervous breakdown ug ilaha kini dayong gihatud sa ilang pinuy-anan. (BANAT NEWS)