CEBU, Philippines — Gimandoan karon sa Konseho sa Siyudad sa Siyudad sa Sugbo ang Department of General Services (DHS) nga kinahanglan nga ipaneguro gyud nga ang tanang sakyanan nga gipanag-iya sa kagamhanan nakatuman sa Clean Air Act of1999, o Republic Act No. 8749 ilabi na kun maghisgot og emission testing.
Niduso og resolusyon si Konsehal Jose Lorenzo Abellanosa kalabot niini nga giaprobahan dayon sa konseho sa labing ulahi nga session niini.
Nasayran nga ang emission standards alang sa motor vehicles nakalatid sa Clean Air Act of 1999.
“Under the Act, the right of citizens to breathe clean air, among other rights, is sought to be recognized and the State shall seek to guarantee their enjoyment,” tipik sa unod sa maong naaprobahan nga resolusyon.
Nagkanayon ang konsehal nga nanag-iya og daghang sakyanan ang kagamhanan sa Siyudad sa Sugbo nga kabahin sa basic services alang sa mga konsituwente niini ug angayan nga ipaniguro nga nakatuman kini sa mga lagda.
Dunay mga report nga pipila sa maong mga sakyanan kay nagbuga og itom nga aso.
“The City Government must set an example by ensuring that the motor vehicles
owned by it are compliant with the emission standards set by the Act,” matud pa ni Abellanosa.
Tumong sa konsehal nga makatabang kini sa pagmintinar alang sa limpyo nga hangin. /MEL (BANAT NEWS)