CEBU, Philippines — Hingpit nga gilusad niadtong Abril 14 ang Hemodialysis Center sa bag-ong gipalapad nga ika-tulo nga andana sa Cebu Provincial Hospital sa Danao.
Ang maong hemodialysis center nahimo pinaagi sa public-private partnership scheme diin ang tinguha mao ang paghatag og serbisyo sa mga renal patients nga taga amihanang bahin sa Sugbo.
Ang third floor sa maong tambalanan maka-accommodate kini og dugang 45 ka rooms ug duha ka semi-private nga lawak.
Si Gobernador Gwendolyn Garcia sa iyang mensahe atol sa maong kalihokan nisaysay kun giunsa niya og damgo nga mohimo og kausaban sa mga tawo sa Danao nga karon usa na ka realidad.
Matud ni Garcia nga bisan og wala siya kadaug sa siyudad sa Danao sa niaging eleksyon, dili kini mahimong rason o babag alang sa paghatag og serbisyo.
“Kining among tatak Garcia-Frasco nga panerbisyo, walay gipili, walay pamolitika. Tabangan ang tanan sigon sa panginahanglan” matud ni Garcia.
Si Dr. Gerardo Aquino Jr, ang hepe sa Vicente Sotto Memorial Medical Center nagkanayon nga ang maong dialysis center sa CPH-Danao nakatabang kini sa ilang kaugalingon nga pasilidad.
Kini ilabina nga temporaryong gi downgrade ang ilang mga dialysis units gikan sa 35 ngadto sa 11 samtang naghulat nga makumpleto ang pagtukod sa ilang mas dako nga kidney care building.
Nasayran ang Kapitolyo nakig-alayon kini sa Medtronix Medical Supplies and Equipment alang sa operasyon sa dialysis center sa CPH-Danao ug CPH-Carcar. — MEL ( Banat News )