CEBU, Philippines — Gidakop sa kapulisan sa Dakbayan sa Carcar ang usa ka Indian national kagahapon sa buntag human niya gikatahong gisunog ang multicab ug balay nga iya sa amahan sa iyang kanhi uyab nga dili na gustong makigbalik kaniya.
Ang insidente nahitabo diha sa SitioGgaymakers, Barangay Perelos, dakbayan sa Carcar. Giila ang dinakpan nga si Ranjit Singh, 46, minyo ug residente sa Barangay San Isidro, Dakbayan sa Talisay.
Ang tag-iya sa balay ug multicab nga gisunog mao si Jose Bacatan Enjambre, 61, molupyo sa nahisgutan nga lugar, amahan sa kanhi uyab sa suspek nga si Flora Mae Navarra Enjambre.
Matud ni Police Lt. Col. Ardioleto Cabagnot, hepe sa Carcar City Police Station nga ang dinakpan niadto sa balay sa biktima nangita kang Flora Mae kay gusto makig-estorya apan wala kini tuguti sa amahan sa babaye nga makaestorya niini iyang anak.
Tungod niini giingong nasuko ug nanghasi ang suspek ug nagkuha og gasolina ug gidauban ang multicab, midako ang kalayo nga miresulta nga mikatap kini sa balay.
Gi-alarmahan kini sa kapulisan sa Carcar City hinungdan nga si Singh si nadakpan. Si Cabagnot miingon nga tulo ka tuig nga nagkarelasyon si Singh ug Flora Mae apan ang babaye matud pa dili na gustong makigbalik kay giingong duna na sab kini laing hinigugma.
Niabot sa P250,000 ang danyos sa multicab nga nasunog samtang P5,000 ang damage sa balay kay partially damage lang kini. Ang dinakpan mag-atubang og kasong arson. — /IBM (BANAT NEWS)