CEBU, Philippines — Si Senador Ronald “Bato” Dela Rosa nitambong sa gipahigayong National Fire Olympics nga gipasiugdahan sa Bureau of Fire Protection kagahapon sa buntag diin ang maong kalihokan subay sa pagsaulog sa Fire Prevention Month.
Matud ni Bato nga importante kaayo kini nga selebrasyon alang sa usa ka bombero nga atleta aron sa pakigpanag-uban ug pakighigalaay sa mga kaubang bombero sa ubang rehiyon sa nasud ug dili lang kini pulos kompetisyon.
Gilakbit usab ni Dela Rosa nga kinahanglang mabalik sa BFP ang ilahang tibuok nga koleksiyon human nahisgutan nga P1 bilyon lang ang pwedeng makuha ug magasto.
Si Dela Rosa nagkanayon nga iyaha kining gihingusgan kada deliberasyon aron makuha sa BFP ang alang kanila.
Ug kong ang maong pundo makuha sa BFP pwede na nga makapalit kada tuig og helicopter ang kada rehiyon ug dako kaayo kini nga tabang alang sa programang modernisasyon sa BFP.
Si Bato nagkanayon nga dili lalim ang giagian niining programa sa wala pa kini nahimong Republic Act 11589 kun “Bureau of Fire Protection Modernization Act”.
Gipadayag ni Dela Rosa nga dili lalim ang paghuna-huna ug pagbuhat sa usa ka balaodnon nga magpakita og pagtubag sa mga panginahanglanon sa BFP dili lang sa pagpalong sa sunog apan lakip sa pagtubag usab sa mga kalamidad.
Gidasig ni Dela Rosa ang BFP nga magpabilin nga dili mausab ang kinasing-kasing nga serbisyo ngadto sa publiko. — BDB (BANATNEWS)