CEBU, Philippines — Mokabat sa 27 ka motorsiklo nga gi-parking sa sidewalk ang nakarga atol sa operasyon sa Cebu City Transportation Office niadtong miaging adlaw.
Suma pa sa CCTO nga dakung kalapasan sa balaud ang pagparking sa sidewalk ug nakamugna usab kini og kalisdanan sa mga tawo nga moagi sa kadalanan.
Lakip sa mga lugar nga ilang gioperasyonan mao ang dalan R. Landon ug Pelaez.
Segun sa statement sa CCTO ang pagparking sa sidewalk nakalapas sa Revised Traffic Code Sec. 1(a), Art. XIV sa CO 801.
"Atong hatagan ug katungod ang mga pedestrian ilabi na ang mga estudyante nga makagamit sa sidewalk isip lakawanan diin ang ilang seguridad ug kaluwasan ang mapatigbabaw ug dili ang pagpasagad ug parking sa sidewalk. Sama sa panultihon nga 'Ang kadalanan para sa sakyanan, ang salidsid (sidewalk) para sa katawhan',” tipik sa statement sa CCTO.
Gipaneguro gyud sa maong departamento nga mapatuman ang mga lagda aron mahimong hapsay ang kadalanan ingong man ang tulin nga pag-agi sa mga tawo. (BANAT NEWS)